Kryeministri Edi Rama komentoi sot protestat kundër investimit në Zvërnec, ku sipas tij, “një projekt zhvillimi u bë brenda pak ditësh pjesë e një lufte ideologjike që nuk ka lindur në Shqipëri dhe që në fakt nuk ka fare për objekt Shqipërinë”.

Në takimin e zgjeruar të grupit parlamentar socialist, Rama theksoi se prej 20 ditësh Shqipëria është kthyer në syrin e një cikloni dixhital.

“Një vorbull shumfish më e madhe sesa vetë përmasa e vendit tonë, e cila përfshiu bashkëqytetarët tanë, të reja, të rinj, familjarë me karroca fëmijësh, patriotë digjital, punonjës të mirëpaguar bankash, komedianë të kthyer në kandidatë, delirantë me qeleshe, intelektual me kapelë republike, njerëz nga çdo anë e botës, media sociale dhe tradicionale, nga të gjitha kontinentet, organizata vendase dhe të huaja, parti politike në Europë dhe në Shtetet e Bashkuara, aktorë të biznesit të turizmit në rajon, dhe aktorë shtetëror malinj ndaj Shqipërisë. Natyrisht edhe karavidhet opozitare të vendit tonë”, shtoi Rama.

Kryeministri theksoi se “një grumbullim i hatashëm gjërash, që as janë njësoj, as janë bashkë, por u mblodhën së bashku në një prurje që nxori në bregun e gjithë atij oqeani virtual, deri dhe dhëmbë të atyre që e kalëruan këtë parti”.

“Sa mundën dhe kur ranë nga kali filluan t’i gjuajnë me këpucët e blera në shopingjet majë kalit. Befas Zvërneci u bë kërthiza e botës ku po vendosej fati i ngrohjes globale”, shtoi Rama.

Marrë nga ATSH