Kryeministri Edi Rama komentoi sot disa prej shqetësimeve të ngritura nga protesta kundër investimit në Zvërnec, ndërsa siguroi se “ne jemi këtu për të fituar Shqipërinë 2030 në Bashkimin Europian.

Në takimin e zgjeruar të grupit parlamentar të PS-së, Rama theksoi se Shqipëria sot është një vend ku kemi numrin më të madh të bizneseve të reja të krijuara, krahasuar me të njëjtën periudhë të një viti më parë.

“Po ka një element tjetër që e tregon historia dhe që na e tregojnë ata që kanë menduar për si zhvillohet bota përpara sa të vinte interneti e tjerë. Ky element quhet pakënaqësia e pritshmërive”, tha Rama.

Pakënaqësia e pritshmërive, sipas tij, “është shprehja më kuptimplotë e një vendi që ka dalë nga një fazë dhe ka hyrë në një fazë të re”.

“E një vendi ku pritshmëritë janë shumë më të larta dhe ku pakënaqësia e pritshmërive është diçka jo e lehtë për t’u administruar dhe ajo që na takon është që ne të vazhdojmë. Planet tona janë në tryezë”, siguroi kryeministri.

Sipas tij, “karta e BE-së është karta e historisë së Shqipërisë dhe karta e BE-së ka brenda të gjitha gjërat për të cilat flasin dhe ata që janë aty në protestë për arsye gjenuine”.

Burimi ATSH