Zëvendëskryeministrja Albana Koçiu deklaroi sot se Shqipëria vijon të shfaqë performancë pozitive ekonomike, duke u renditur ndër vendet me treguesit më të mirë në rajon për sa i përket rritjes ekonomike dhe inflacionit.

Duke iu referuar statistikave të publikuara së fundmi, Koçiu theksoi se në prill 2026 Shqipëria shënoi një normë inflacioni prej 2,8%, më të ulët se vendet e tjera të rajonit dhe mesatarja e Bashkimit Evropian.

“Ndërkohë që zhurma vazhdon për konsum të përditshëm politik e mediatik, faktet flasin qartë. Shqipëria nuk ka qenë asnjëherë më e qëndrueshme, më konkurruese dhe më e sigurt në rrugën e saj të zhvillimit ekonomik me një rritje prej 3,4% dhe, mbi të gjitha, me nivelin më të ulët të inflacionit në rajon, 2,8%”, u shpreh Koçiu.

Sipas të dhënave të inflacionit të harmonizuar të Eurostat, në muajin prill 2026, Shqipëria regjistroi inflacion 2,8%, krahasuar me 3,6% në Serbi, 7,5% në Kosovë, 5,7% në Maqedoninë e Veriut, 6,8% në Bosnjë-Hercegovinë, 3,6% në Mal të Zi dhe 3,2% mesatarja e Bashkimit Evropian.

Koçiu vlerësoi se këta tregues pasqyrojnë qëndrueshmërinë e ekonomisë shqiptare dhe efektet e politikave të ndjekura për kontrollin e inflacionit dhe ruajtjen e stabilitetit makroekonomik.

“Ky bilanc pozitiv tregon qartë se ndërsa debatet e zhurmshme mundohen të vazhdojnë rrugën e dizinformimit, puna dhe vizioni ynë po përkthehen në rezultate konkrete për qytetarët. Shifrat nuk bëjnë propagandë. Ato tregojnë qartë drejtimin e duhur që po ndjek Shqipëria në rrugën drejt Bashkimit Europian”, theksoi ajo.

Sipas zëvendëskryeministres, ruajtja e një inflacioni të ulët dhe ritmet pozitive të rritjes ekonomike mbeten faktorë kyç për mirëqenien e qytetarëve dhe forcimin e perspektivës evropiane të vendit.