Ministri për Evropën dhe Punët e Jashtme, Ferit Hoxha, deklaroi sot se marrëdhëniet mes Shqipërisë dhe Greqisë ndodhen në një nga periudhat më pozitive, ndërsa theksoi se Athina mbetet një mbështetëse e rëndësishme e procesit të anëtarësimit të Shqipërisë në Bashkimin Evropian.

Në një takim me gazetarë nga vendet anëtare të Bashkimit Evropian, Hoxha u pyet nëse ekziston ndonjë fushë apo aspekt që mund të shndërrohet në problem në raport me Greqinë gjatë procesit të integrimit evropian.

Ministri vlerësoi ecurinë e marrëdhënieve dypalëshe, duke nënvizuar gatishmërinë e përbashkët për të adresuar çështjet e mbetura pezull.

“Marrëdhëniet tona me Greqinë, jam shumë i lumtur t’ju them, po jetojnë në një periudhë ku marrëdhëniet tona kurrë nuk kanë qenë më pozitive dhe ku kemi një frymë kaq të bashkëndarë në përpjekje për të bërë gjithçka për të trajtuar, në mos për t’i zgjidhur, ato çështje që kanë qenë pjesë e marrëdhënieve dypalëshe”, tha Hoxha.

Ai theksoi se mes dy vendeve ekziston një vullnet i përbashkët për të ecur përpara dhe për të zgjidhur çështjet e hapura, përfshirë edhe atë të delimitimit të hapësirave detare.

“Ka një dëshirë të përbashkët për të ecur përpara, për të vendosur gjithçka në perspektivë dhe për të trajtuar disa çështje shumë të vjetra të mbetura pezull, përfshirë edhe një çështje themelore që duhet të zgjidhim, që është shelfi kontinental dhe zonat detare”, u shpreh ministri.

Sipas Hoxhës, pas përpjekjeve të mëparshme për të arritur një marrëveshje përmes negociatave, të dy vendet kanë vendosur t’i drejtohen Gjykatës Ndërkombëtare të Drejtësisë.

“U përpoqëm, nuk mundëm ta bënim. U përpoqëm dy herë të arrinim një marrëveshje përmes negociatave, nuk dolëm në përfundime, kështu që vendosëm të shkojmë në gjykatë. Si Shqipëria ashtu edhe Greqia do t’i drejtohen Gjykatës Ndërkombëtare të Drejtësisë dhe do të paraqesin dosjet përkatëse në mënyrë që gjyqtarët të marrin vendimin”, deklaroi ai.

Duke folur për procesin e integrimit evropian, Hoxha vlerësoi mbështetjen e Athinës për anëtarësimin e Shqipërisë në BE.

“E shikojmë Greqinë si një mbështetëse të madhe të zgjerimit dhe të anëtarësimit në BE. E shohim si një aleate dhe mbështetëse shumë të madhe të anëtarësimit të Shqipërisë në Bashkimin Evropian”, tha ministri.

Ai shtoi se Shqipëria po vijon punën me vendet partnere gjatë presidencave të ardhshme të Këshillit të BE-së, duke përfshirë Irlandën, Lituaninë dhe Greqinë, në frymën e bashkëpunimit dhe mbështetjes reciproke për avancimin e procesit të integrimit evropian.

Burimi ATSH