Për herë të parë, Shqipëria mirëpriti Konferencën e Kartës Rinore Evropiane, duke mbledhur mbi 100 përfaqësues nga më shumë se 30 vende të Evropës.

Ministri i Turizmit, Kultures dhe Sportit, Blendi Gonxhja tha se kjo ngjarje përfaqëson një vlerësim të rëndësishëm për rolin gjithnjë e më aktiv të vendit tonë në nxitjen e politikave dhe iniciativave evropiane në mbështetje të të rinjve.

Karta Rinore Evropiane po konsolidohet si një instrument konkret që zgjeron mundësitë për të rinjtë shqiptarë, duke u ofruar akses në një gamë të gjerë përfitimesh dhe eksperiencash, si:

– Zbritje në transport, udhëtime dhe akomodim në Shqipëri dhe në vendet evropiane;

– Oferta në kinema, teatro, muze, koncerte dhe aktivitete të tjera kulturore;

– Mundësi dhe përfitime në trajnime, edukim joformal dhe zhvillim profesional;

– Zbritje në aktivitete sportive dhe rekreative;

– Akses në një rrjet evropian me miliona të rinj dhe mijëra partnerë;

– Mundësi për lëvizshmëri, shkëmbime rinore dhe eksperienca ndërkombëtare.

Ministri Gonxhja tha se Karta Rinore Evropiane është më shumë sesa një kartë përfitimesh. Ajo është një mjet që fuqizon të rinjtë, duke i ndihmuar të kursejnë, të udhëtojnë, të zhvillojnë aftësitë e tyre dhe të krijojnë lidhje me mundësi të reja në të gjithë Evropën. Në të njëjtën kohë, ajo kontribuon në rritjen e pjesëmarrjes aktive të të rinjve dhe në afrimin e tyre me vlerat dhe mundësitë që ofron hapësira evropiane.

Burimi ATSH