Kryeministri Edi Rama në takimin e organizuar në Parkun Arkeologjik të Apolonisë, në Fier me rastin e 35-vjetorit të krijimit të Partisë Socialiste u ndal tek protestat që po zhvillohen kundër investimit të planifikuar në Zvërnec të Vlorës.

Në fjalën e tij Rama tha se ajo çfarë po ndodh sot me Shqipërinë dhe pse Shqipëria po përdoret kaq masivisht në vende dhe nga njerëz të cilët nuk është nga ndonjë dhimbje se çfarë do ndodhi me flamingot e Zvërnecit, por sepse Shqipëria sot përveç të tjerash është një epiqendër e një sërë përplasjesh.

“Nuk po them që njerëzit që dalin atje janë agjentë, janë spiunë, janë të futur nga forca të errëta. Nuk po them këtë fare, por që përveç një pjese të mirë aty që janë këta politikanët e rinj të partive të reja që u vjetëruan shumë më shpejt, është një pjesë e njerëzish aty që kanë rënë pre e gjithë kësaj gjëje. Atyre që shqetësohen për mjedisin në mënyrë legjitime, atyre që shqetësohen për Shqipërinë, që Shqipëria është e shqiptarëve, që Shqipëria nuk mund të shitet”, theksoi Rama.

Kreu i qeverisë u shpreh se “megjithëse këto janë gjëra shumë shqetësuese në mënyrën se si mendohen dhe artikulohen, iu duket gabimisht sikur bota është me ta, iu duket sikur ai sistem mediatik në Amerikë, por edhe në Europë, gjithë ato platforma janë në kulmin e një simpatie që këta njerëz po luftojnë për atdheun e tyre, që këta njerëz po luftojnë për mjedisin në vendin e tyre”.

“Kush e mendon kështu gënjen veten në mënyrë shumë naive. Shqipëria këtu ka qenë dhe çështjet e mjedisit, të natyrës, çështje të kafshëve, të shpendëve, të lumenjve ka pasur dhe ka pasur shumë të rënda”, tha Rama.

Burimi ATSH