Kryeministri Edi Rama deklaroi sot se aludimet për lidhjen e projektit të Zvërnecit me kredi politike nga Shtëpia e Bardhë dhe Donald Trump janë të pasakta.

Gjatë një konference për shtyp me gazetarë nga vende të Bashkimit Europian, Rama tha se arsyeja pse bota është kaq e entuziazmuar me këtë çështje për shkak të Donald Trump.

“Nuk besoj se flamingot në Shqipëri do të kishin bërë një trazim kaq të madh nëse nuk do të ishte një rast për t’i shkuar pas Donald Trump. Por kjo nuk ka të bëjë me Donald Trump. Kur Jared Kushner dhe Ivanka Trump erdhën këtu, nuk ishte e qartë nëse Trump do të shkonte në burg apo në Shtëpinë e Bardhë. Dhe për mua ata ishin investues amerikanë që pyesnin nëse mund të kishin një shans në Shqipëri dhe nuk ishin familja e Donald Trump. Siç e thashë, Donald Trump aso kohe mund të shkonte edhe në burg, sepse përballej me shumë akuza asokohe. Por nuk më takonte mua të merresha me këtë. Pa mendoni nga njëra anë, mua më thonë se jam gjithmonë njeriu i Sorros, tani njeriu i Kushner. Gjejeni kush jam”, tha Rama.

Ai theksoi se qëllimi i tij është të sigurojë se çdo projekt zhvillohet mbi bazën e fakteve dhe transparencës.

“Jam kryeministri i Shqipërisë që dua që të gjithë të vijnë dhe të investojnë këtu dhe dua të jenë miq të këtij vendi. Nuk mendoj se Shqipëria duhet të jetë po themi ushqim për betejat politike në Amerikë apo diku gjetkë. Dua që çdo gjë, çdo projekt, të jetë i bazuar në fakte dhe përgjigjja do të jepet përmes projektit. Nëse projekti do të japë përgjigje, do të vazhdojmë. Nëse nuk do të japë përgjigje të duhura, projekti duhet të përmirësohet. Por 25% më shumë natyrë, gjelbërim dhe rigjenerim është ajo që do të sillet nga projekti, sepse këto janë objektivat që kemi”, tha Rama.

Ai theksoi se numri më i madh i arkitektëve më të mirë të botës po punojnë së bashku më vete për projektin

“Nuk jam zgjuar kurrë një ditë të jetës sime me mendimin të bëj diçka të shpejtë. Gjithmonë kam besuar se bukuria është ajo për të cilën kemi nevojë dhe kam luftuar gjithmonë për bukurinë. A kam pasur gjithmonë sukses? Jo gjithmonë. Por sot Shqipëria është një vend dhe ju sfidoj me fakte, ku numri më i madh i arkitektëve më të mirë të botës po punojnë së bashku më vete për projektin”, tha ai.

Rama theksoi se kërkohet të ndodhin gjëra që ndryshojnë këtë vend një herë e mirë, jo vetëm perceptimin për vendin.

“Ky lloj përqendrimi është diçka që nuk e gjeni dot në asnjë vend të Europës. Pse? Sepse ne duam bukurinë, duam cilësinë dhe duam që të ndodhin gjëra që ndryshojnë këtë vend një herë e mirë, jo vetëm perceptimin për vendin që ka qenë i ndërtuar në mënyrë të drejtë mbështetur në gjerat më të këqija, krimi, korrupsioni, droga”, deklaroi kryeministri.

Burimi ATSH