Kryeministri Edi Rama nënvizoi sot mundësitë që sjell arsimi profesional në tregun e punës, ndërsa solli në vëmendje faktin se vetëm në kantierin e industrisë së prodhimit të anijeve në Pashaliman do të hapen fillimisht 400 vende pune për të arritur në perspektivë në 800 të tilla.

Gjatë Konferencës së 3-të Kombëtare të Arsimit Profesional, Rama solli në vëmendje marrëveshjen me kompaninë “Fincantieri”, për të hapur industrinë e anijeve në Pashaliman.

“Ne e kemi kantierin, por nuk kemi aty gjë tjetër përveçse kantierin e të shkuarës. ‘Fincantieri’ është një nga ekselencat më të mëdha të botës në fushën e prodhimit dhe mirëmbajtjes së anijeve dhe për arsye se ata tani duan të shtojnë prodhimin në profilin e anijeve ushtarake”, shtoi Rama.

Bazuar në këtë marrëveshje, Rama informoi se “disa tipologji të anijeve që janë më të vogla do të bëhen në Shqipëri.

“Kjo për arsyen se në kantierin e tyre bëjnë anije të mëdha dhe kanë nevojë për volum. Do prodhojmë anije luftarake fillimisht për ushtrinë tonë, dy anije luftarake që janë të nevojshme në bazë të kapaciteteve që na ka përcaktuar NATO dhe pastaj do prodhojmë anije dhe do shesim anije bashkërisht, një kompani e përbashkët”, tha Rama.

Dhe sipas tij, “gjëja e parë që do bëhet është se do t’i drejtohemi Shkollës Tregtare Industriale të Vlorës për të prezantuar projektin, profesionet dhe për t’i ftuar të rinjtë që të firmosin marrëveshje me ‘Fincantieri’-n dhe të fillojnë të trajnohen, duke shkuar dhe në Itali, për të qenë gati në momentin që fillon”.

“Bëhet fjalë për 400 vende pune në fillim dhe që do të shkojnë në perspektivë 800. Nuk janë vende pune për juristë, as për ekonomistë. Janë vende për të gjithë zinxhirin e zanateve që ka nevojë ajo industri, që nga puna e dorës, deri tek manipulimi ose drejtimi i robotëve. Ky është arsimi profesional”, shtoi Rama.

Burimi ATSH