Kryeministri Edi Rama gjatë një takimi me banorë të Zvërnecit sot deklaroi se projekti i resortit turistik në zonë do ta shndërrojë Vlorën në një destinacion me rëndësi botërore.

Gjatë bashkëbisedimit Rama u ndal edhe tek incidenti i raportuar më herët në zonë për keqtrajtimin e një protestuesi nga polici private, duke e cilësuar të papranueshëm dhe duke theksuar reagimin e menjëhershëm të institucioneve.

“E ajo që ndodhi me atë djalin që u tërhoq zvarrë është një gjë e neveritshme dhe nuk bën vaki që qeveria të jetë e përfshirë, pasi nuk do të ndodhte që të shkarkohej menjëherë drejtori i policisë dhe të hiqej licensa e kompanisë së sigurisë”, u shpreh Kryeministri.

Duke folur për projektin, Rama theksoi rëndësinë e tij për zhvillimin ekonomik të zonës dhe ndikimin në investimet e ardhshme.

“Duhet ta bëjmë këtë projekt me patjetër, pasi Vlora me këtë projekt nuk është më një qytet i Shqipërisë, por një destinacion i botës. Ky investim do të sjellë shumë investime të tjera për blerje pasurie të paluajtshme, apartamente dhe biznese; është një efekt zinxhir i jashtëzakonshëm”, deklaroi ai.

Kryeministri shtoi se kundërshtitë ndaj projekteve të mëdha janë të pritshme, por nuk duhet të bllokojnë zhvillimin.

“Do të vijnë ata (investitorët – shën. i red.) nga anë e anës me miliarda për të prishur apo bllokuar projektin?! Do të vijnë për ta bërë Shqipërinë ‘delen e zezë’ të botës?! Këto projekte bëhen me komunitetin dhe kjo është pjesë e programit. Në momentin që do të jetë gati projekti, do të vijnë bashkë me mua tek ju. Transparenca bëhet kur projekti të përfundojë”, u shpreh Kryeministri.

Rama u shpreh se projektet strategjike nuk mund të vihen në diskutim përmes presioneve politike apo protestave.

“Ky investim nuk ikën nga Shqipëria sa të jem unë këtu, sepse po iku, i bie të kthejmë përmbys çdo gjë”, deklaroi Kryeministri.

“Po kur thonë i kemi dhënë pesë kushte. Po kur jap dorëheqjen, si t’i plotësoj katër kushtet e tjera?! Nuk ka shans të bëj negociata. Një gjë është e sigurt, që procesi ka qenë shumë strikt. Protestuesit kishin thënë se investimi është 27 milionë euro dhe po të shikosh kjo është leje që është kthyer mbrapsht. Ne kemi kërkuar një projekt gjithnjë e më të përshtatur me mjedisin, me distanca nga laguna, si dhe me ruajtjen e biodiversitetit dhe parametrave mjedisorë”, theksoi Kryeministri.

Burimi ATSH