Ministria e Bujqësisë dhe Zhvillimit Rural miratoi ligjin për Shëndetin e Kafshëve, një akt i rëndësishëm në kuadër të procesit të integrimit evropian dhe zbatimit të Planit të Rritjes (Growth Plan), që synon përafrimin e legjislacionit shqiptar me Rregulloren (BE) 2016/429.

Ligji i ri synon forcimin e sistemit të parandalimit dhe kontrollit të sëmundjeve te kafshët, garantimin e sigurisë ushqimore dhe mbrojtjen e shëndetit publik, si dhe përmirësimin e gjurmueshmërisë dhe lëvizjes së kafshëve.

Sipas MBZHR -së, përmes këtij harmonizimi Shqipëria afrohet më tej me tregun dhe standardet e Bashkimit Evropian, duke rritur besueshmërinë dhe konkurrueshmërinë e sektorit blegtoral.

Ligji parashikon masa për forcimin e kontrollit dhe monitorimit të sëmundjeve të kafshëve, duke krijuar një sistem më efikas raportimi dhe reagimi ndaj rasteve të shpërthimeve, si dhe duke reduktuar rrezikun e sëmundjeve që transmetohen nga kafshët te njerëzit.

Një tjetër element i rëndësishëm është rritja e sigurisë ushqimore përmes kontrollit më të mirë të zinxhirit të prodhimit, si dhe vendosja e standardeve më të larta për mirëqenien dhe trajtimin e kafshëve.

Gjithashtu thekson MBZHR -ja, ligji synon gjithashtu të përmirësojë sistemin e identifikimit dhe gjurmueshmërisë së kafshëve, duke garantuar më shumë transparencë në lëvizjen e tyre dhe duke lehtësuar kontrollin veterinar.

Ministria e Bujqësisë vlerëson se zbatimi i këtij ligji do të krijojë kushte më të favorshme për tregtinë dhe eksportet e produkteve blegtorale, duke rritur besimin e partnerëve ndërkombëtarë dhe duke afruar më tej sektorin shqiptar me kërkesat dhe standardet e Bashkimit Evropian.

Sias MBZHR-së, miratimi i Ligjit për Shëndetin e Kafshëve konsiderohet një hap i rëndësishëm drejt modernizimit të sistemit veterinar në vend dhe fuqizimit të sektorit të blegtorisë, në funksion të sigurisë ushqimore, mbrojtjes së shëndetit publik dhe zhvillimit të qëndrueshëm të ekonomisë rurale.

Burimi ATSH