Kryeministri Edi Rama reagoi sot në lidhje me investimin që parashikohet të bëhet në Zvërnec, duke deklaruar se zhvillimi duhet parë në një këndvështrim më i gjerë ekonomik.

Përmes një postimi në rrjetet sociale, Rama tha se toka private në Zvërnec është blerë përmes transaksioneve të rregullta bankare dhe të certifikuara nga institucionet përkatëse.

Sipas tij, investitorët janë sipërmarrës ndërkombëtarë, pjesë e një grupi të madh ekonomik të njohur si Power Holding, me aktivitet në disa vende të botës.

“Nuk sheh syri sheh mendja! Dy projekte të realizuara tanimë nga fiks bashkëinvestitorët e projektit që ka tronditur armiq të Shqipërisë Europiane, konkurentë të Shqipërisë Turistike, shqiptarë të verbër që po përdoren si vegla qorre kundër Shqipërisë, po edhe shqiptarë të ndershëm e të ndjeshëm ndaj mjedisit.

“Kështu e kuptojnë zhvillimin në harmoni me natyrën ata që sot janë blerësit legjitimë të truallit privat në Zvërnec, dy vëllezërit e famshëm nga Katari që e kanë paguar me transaksione bankare të çertifikuara nga institucionet shqiptare e ndërkombëtare, si edhe bashkëpronarë të konglomeratit global Power Holding, një fuqi e madhe sipërmarrëse jo vetëm në Lindjen e Mesme, po edhe më gjerë”, shkruan Rama.

Ai ftoi publikun të informohet më shumë mbi aktivitetin e kompanisë, duke theksuar se projektet e reja do të kontribuojnë në zhvillimin ekonomik dhe turistik të vendit.

Kreu i qeverisë theksoi se kundërshtime të tilla janë hasur edhe më parë në projekte të mëdha infrastrukturor.

“Kush do të njihet me aktivitetin e tyre dhe të mësojë më shumë edhe për dy zhvillimet e bukura të postuara këtu, le të klikojë poëerholding.com që të kuptojë se kush po vjen në këtë Shqipëri, e pse s’mund të vijë kurrë dot për të prishur po vetëm për të lartësuar.

“Ndërsa kush nuk do të dëgjojë e të kuptojë, do duhet të presë si ata që ishin kundër stadiumit kombëtar, e pastaj panë finalen europiane në Tiranë duke bërë selfije me stadiumin”, tha Rama.

Burimi ATSH