Kryetari i PS-së, njëherazi kryeministri Edi Rama foli sot për projektet e transformimit të Plazhit të Durrësit, duke theksuar se zona që dikur ishte e ndikuar nga ndotja e ujërave të zeza është shndërruar në një hapësirë me zhvillim të vazhdueshëm urban dhe turistik.

Në fjalën e mbajtur gjatë aktivitetit me rastin e 35-vjetorit të Partisë Socialiste në Durrës, Rama tha se Plazhi i Durrësit ka kaluar një proces të thellë transformimi, ku është realizuar zgjerimi i vijës së rërës në rreth 80% të projektit, ndërsa pritet të vijojë edhe faza e dytë, e cila do ta zgjerojë vijën e plazhit me rreth 100 metra më shumë se më parë.

Kryeministri u shpreh se paralelisht me këtë ndërhyrje, në bashkëpunim me një prej studiove më të njohura ndërkombëtare të arkitekturës, është planifikuar edhe rigjenerimi i plotë i vijës bregdetare, përfshirë pyllëzimin e zonës, me synimin për të krijuar një hapësirë moderne dhe të qëndrueshme mjedisore.

“Janë dashur disa vite dhe do të duhen edhe disa vite të tjera, por zhvillimi në Durrës dhe në gjithë Shqipërinë tregon se puna nuk është ndalur asnjë ditë. Nuk kemi bërë gjithçka në mënyrë perfekte, por kemi mësuar nga gabimet dhe kemi ecur përpara”, u shpreh Rama.

Ai theksoi gjithashtu se Shqipëria është sot më afër integrimit në Bashkimin Europian dhe se ky proces përbën një objektiv madhor kombëtar, i cili, sipas tij, kërkon vijimësi të reformave dhe projekteve transformuese në vend.

Burimi ATSH