Nga pasioni për muzikën te krijimi i një platforme inteligjente për menaxhimin online të muzikës në ambiente biznesi, historia e DJ Benito ishte në fokus të podkastit “FLASIM”, ku ai prezantoi projektin “Happy Beat”, një platformë shqiptare e dedikuar për lokale, restorante dhe qendra tregtare.

Gjatë bisedës me kryeministrin Edi Rama, DJ Benito tregoi se pasioni për muzikën nisi që në fëmijëri, ndërsa karrierën si DJ e filloi në vitin 2005.

“Muzikën e kam pasur gjithmonë hobi që në fëmijëri. Duke dëgjuar gjithë kohës muzikë u apasionova dhe fillova në një klub në 2005-ën, ku m’u dha mundësia të vazhdoja si DJ rezident”, tha ai.

Sipas tij, ideja për krijimin e platformës “Happy Beat” lindi nga nevoja për të menaxhuar në mënyrë më efikase muzikën në ambientet ku ofronte shërbime.

“Kjo lindi si nevojë. Dikur mirëmbaja muzikën në ambiente fizikisht, duke i përditësuar playlist-at me USB. Kur klientela u rrit dhe kjo u bë e papërballueshme, mendova të kaloj drejt streaming-ut dhe krijimit të një platforme online”, deklaroi DJ Benito.

Platforma “Happy Beat” funksionon përmes internetit dhe u mundëson lokaleve, restoranteve apo qendrave tregtare të kenë muzikë të personalizuar sipas profilit të ambientit.

“Përmes kësaj platforme përdoruesit logohen dhe çdo gjë funksionon online. Edhe mirëmbajtja bëhet nga Happy Beat”, shpjegoi ai.

Kryeministri Rama e cilësoi platformën si një inovacion interesant në fushën e teknologjisë dhe argëtimit.

“Ky është një inovacion. Ka krijuar një platformë përmes së cilës shkon tek të gjithë lokalet pa qenë fizikisht aty”, u shpreh Rama.

Burimi ATSH