Ministri për Evropën dhe Punët e Jashtme, Ferit Hoxha, në kuadër të turit “BE dhe Ti: Evropa fillon këtu”, zhvilloi një bashkëbisedim me nxënës të gjimnazit “Sherif Hoxha” në Koplik (Malësia e Madhe).

Gjatë takimit, Hoxha u ndal te rëndësia e njohjes së Bashkimit Europian, si projekti më i suksesshëm i paqes, solidaritetit dhe bashkëpunimit në historinë moderne, si dhe si një hapësirë konkrete mundësish për zhvillim, dije dhe fuqizim të potencialit njerëzor.

Ai theksoi se rruga euroatlantike e Shqipërisë është zgjedhje e qartë dhe e qëndrueshme, ndërsa vlerat si liria, demokracia, solidariteti dhe respekti për të ndryshmen përbëjnë themelin e përbashkët me vlerat europiane.

“U ndalëm te rëndësia e njohjes së Bashkimit Europian, jo vetëm si projekti më i suksesshëm i paqes, solidaritetit dhe bashkëpunimit në historinë moderne, por edhe si një hapësirë konkrete mundësish për zhvillim, dije dhe fuqizim të potencialit njerëzor. Diskutuam hapur për arsyet pse Shqipëria ka zgjedhur me bindje rrugën euroatlantike dhe pse vlerat tona si shoqëri, liria, demokracia, solidariteti dhe respekti për të ndryshmen, janë në thelb vlera evropiane”, u shpreh Hoxha.

Sipas ministrit, procesi i integrimit në BE është gjithëpërfshirës dhe kërkon angazhimin e të gjithëve, ndërsa roli i brezit të ri mbetet thelbësor në ndërtimin e një Shqipërie europiane përmes dijes, ideve dhe talentit.

“Sot, kur perspektiva e anëtarësimit të Shqipërisë në BE është më konkrete se kurrë, ky mbetet një proces gjithëpërfshirës: askush nuk është jashtë tij dhe secili ka një rol për të luajtur. Prandaj, është thelbësore që kjo gjeneratë të investojë në dije, të kuptojë më mirë BE-në dhe të përgatitet për të qenë pjesë aktive e një Shqipërie europiane, duke sjellë ide, energji dhe talent në ndërtimin e një të ardhmeje më të drejtë, më të zhvilluar dhe më të sigurt për të gjithë”, deklaroi Hoxha.

Marrë nga ATSH