Zona e Shirokës, e vendosur buzë Liqenit të Shkodrës, po merr vëmendje të shtuar në kuadër të zhvillimit të turizmit të qëndrueshëm dhe promovimit ndërkombëtar, pas dorëzimit të dosjes për përfshirje në listën e UNESCO.

Ministri i Mjedisit, Sofjan Jaupaj, gjatë një takimi me kryetarin e Bashkisë Shkodër, Benet Beci, si dhe me partnerë lokalë, diskutuan mbi potencialin e madh natyror dhe turistik që ofron kjo zonë.

Gjatë këtij takimi, Jaupaj bëri të ditur se dosja për UNESCO tashmë është dorëzuar, duke e konsideruar këtë një hap të rëndësishëm drejt rritjes së vlerësimit dhe mbrojtjes së kësaj pasurie natyrore.

“Fokusi ynë tani është i qartë: më shumë projekte ndërkombëtare, më shumë promovim dhe integrim i plotë i Shirokës në ofertën ekoturistike të Shqipërisë”, u shpreh ministri, duke theksuar rëndësinë e bashkëpunimit me partnerët vendas dhe të huaj.

Nga ana e tij, kryebashkiaku Beci nënvizoi se Bashkia Shkodër do të vijojë të mbështesë iniciativa që synojnë zhvillimin e qëndrueshëm të zonës, duke ruajtur njëkohësisht vlerat natyrore dhe kulturore.

Shiroka, një nga destinacionet më të njohura pranë Shkodër, konsiderohet një aset me potencial të lartë për turizmin natyror dhe atë të qëndrueshëm, falë pozicionit të saj unik dhe biodiversitetit të pasur.

Përfshirja në listën e UNESCO-s do të rriste ndjeshëm vizibilitetin ndërkombëtar të zonës, duke tërhequr më shumë vizitorë dhe investime, ndërsa do të garantonte njëkohësisht standarde më të larta për mbrojtjen e mjedisit dhe zhvillimin afatgjatë.

Burimi ATSH