Autoriteti i Mbikëqyrjes Financiare (AMF) zhvilloi një takim konsultues me përfaqësues të Shoqatës së Siguruesve të Shqipërisë, në kuadër të prezantimit të draftligjit “Për sigurimin e detyrueshëm në sektorin e transportit”.

Gjatë takimit, nëndrejtore e AMF-së, Merita Gurabardhi e shoqëruar nga ekipi i ngarkuar për hartimin e projektligjit, theksoi se iniciativa ka për qëllim përafrimin e plotë të kuadrit ligjor vendas me direktivën e Bashkimit Evropian “Sigurimi i përgjegjësisë ndaj palëve të treta nga mjeti motorik”, si dhe forcimin e mbrojtjes së konsumatorit.

“Ky projektligj synon krijimin e një baze ligjore më të qartë, të plotë dhe të zbatueshme për tregun e sigurimit të detyrueshëm në sektorin motorik, duke sjellë transparencë dhe rritje të besueshmërisë për qytetarët dhe bizneset”, tha Znj. Gurabardhi.

Shoqata e Siguruesve vlerësoi rëndësinë e këtij procesi konsultues dhe shprehu gatishmërinë për të marrë pjesë aktivisht në vijimin e diskutimeve, duke paraqitur komentet dhe qëndrimet e tyre mbi projektligjin.

Përfaqësuesit e siguruesve nënvizuan se harmonizimi i kuadrit ligjor shqiptar me standardet evropiane do të krijojë një treg më të qëndrueshëm dhe të parashikueshëm për kompanitë dhe konsumatorët.

Palët ranë dakord që takimet teknike do të vijojnë gjatë muajit maj, me qëllim thellimin e diskutimeve mbi çështjet e evidentuara dhe adresimin e aspekteve teknike e rregullatore që kërkojnë harmonizim të mëtejshëm.

Ky proces konsultimi do t’i paraprijë fazës së konsultimit publik, si edhe procedurave të mëtejshme institucionale për miratimin e projektligjit, duke siguruar një proces transparent dhe gjithëpërfshirës për të gjithë aktorët e tregut.

Burimi ATSH