Kryeministri Edi Rama kërkoi sot që inspektoriatet t’i japin fund kontrolleve të befasishme nëpër biznese dhe të ndërtojnë një kulturë kontrollesh zyrtare mbi bazë risku të monitoruara nga qendra.

Në një takim me operatorë të biznesit ushqimorë, Rama vlerësoi procesin e jetësimit të ligjit të ri për Inspektoriatet, ndërsa nënvizoi nevojën për trajnim të vazhdueshëm të inspektorëve.

“Nga ana tjetër nevojitet ndërtimi i një kulture dhe praktike kontrollesh zyrtare mbi bazë risku të harmonizuara dhe monitoruara nga qendra. Duhet t’i jepet fund njëherë e mirë në të gjitha inspektoriatet, traditës së vjetër e të shëmtuar të kontrollove të befasishme të iniciuar nga vetë inspektorët, që janë një shëmti e vërtetë”, shtoi Rama.

Po ashtu, kryeministri vlerësoi gatishmërinë e BE-së për të mbështetur me dije institucionet shqiptare.

“Ne kemi sot një Institut të Sigurisë Ushqimore dhe Veterinare që kërkon mbështetje, rritje kapacitetesh dhe zgjerim të rolit të vetë. Ne kemi gatishmërinë e BE-së për të na mbështetur me binjakëzim mes institucioneve. Po zhvillohen bisedime në këtë drejtim dhe së shpejti do të kemi binjakëzim të AKU-së dhe të Institutit të Sigurisë Ushqimore dhe Veterinare”, shtoi Rama.

Burimi ATSH