Kryeministri Edi Rama, gjatë vizitës në Abu Dabi, u prit sot në takim nga Presidenti Sheikh Mohammed Bin Zayed.

Rama ndau pasditen e sotme pamjet e publikuara nga Agjencia e Lajmeve të Emirateve (WAM) lidhur me këtë takim.

Ndërsa e cilësoi takimin vëllazëror, kryeministri Rama shprehu bindjen e fortë se për paqedashësit e ndërtuesit vullnetmirë të së ardhmes, më e mira është e gjitha përpara.

“Abu Dabi- Takimi sot me mikun e shtrenjtë, Presidentin Sheikh Mohammed Bin Zayed, ishte vëllazëror dhe me bindjen e fortë se për paqedashësit e ndërtuesit vullnetmirë të së ardhmes, më e mira është e gjitha përpara”, u shpreh Rama.

Vizita e kryeministrit Rama në Abu Dabi synon të përcjellë mbështetje dhe solidaritet të drejtpërdrejtë me Emiratet e Bashkuara Arabe, ndërsa rikonfirmon lidhjet miqësore mes dy vendeve.

Sipas Agjencisë së Lajmeve të Emirateve (WAM), gjatë takimit, të dy palët diskutuan mënyrat për të zhvilluar më tej marrëdhëniet EBA-Shqipëri në sektorët prioritarë, veçanërisht ekonomi, tregti, energjinë e rinovueshme dhe teknologji, në interes të të dy vendeve.

WAM bëri të ditur se “Sheikh Mohamed bin Zayed Al Nahyan dhe Rama riafirmuan angazhimin e tyre për forcimin e mëtejshëm të lidhjeve dypalëshe, të cilat vazhdojnë të shohin përparim të qëndrueshëm dhe për zgjerimin e partneriteteve të zhvillimit për të nxitur rritje të qëndrueshme ekonomike që përmbush aspiratat e të dy popujve për përparim dhe prosperitet”.