Kryeministri Edi Rama deklaroi sot, në rubrikën “Shënimet e javës” në Podkastin “FLASIM”, se vizitat e fundit në Romë dhe Barcelonë konfirmojnë forcimin e rolit të Shqipërisë në marrëdhëniet ndërkombëtare dhe rritjen e besueshmërisë së saj në arenën globale.

Duke u ndalur te vizita në Itali, Rama theksoi rëndësinë e bashkëpunimit me qeverinë italiane dhe marrëdhëniet historike mes dy vendeve.

“Këtë javë pata një udhëtim me dy ndalesa, në Romë dhe në Barcelonë. Në Romë, ku u takova me kryeministren e Italisë, Giorgia Meloni, ishte një moment për të bërë një bilanc të ecurisë së projekteve të përbashkëta dhe, nga ana tjetër, për të konfirmuar përmes kësaj ecurie fazën e re të marrëdhënieve mes dy vendeve tona, sepse Italia ka qenë gjithmonë pranë Shqipërisë”, tha Rama.

Ai vlerësoi mbështetjen e vazhdueshme të Italisë ndër vite, duke nënvizuar një intensifikim të bashkëpunimit me qeverinë aktuale italiane.

“Të gjitha qeveritë italiane, pa dallim, kanë qenë të gatshme dhe gjithmonë të vëmendshme për ta mbështetur dhe ndihmuar Shqipërinë. Por, me qeverinë aktuale të Republikës së Italisë, gjërat kanë shkuar në një nivel tjetër. Bashkëpunimi nuk është thjesht një bashkëpunim i cili bazohet te angazhimi reciprok”, theksoi Rama.

Sipas Ramës, marrëveshjet e fundit kanë konkretizuar një partneritet strategjik më të strukturuar.

“Pra, edhe firmosja e marrëveshjes strategjike mes dy qeverive në takimin e mëparshëm në Romë është, në të vërtetë, pasqyra më kuptimplotë e faktit se marrëdhënia, e cila gjithmonë ka qenë e karakterizuar si strategjike, ka marrë një ngjyrë të re përmes projekteve të bashkëpunimit strategjik. Një bashkëpunim i strukturuar, një bashkëpunim i cili lidhet qoftë me zhvillimin, qoftë me sigurinë”, tha Rama.

Në vijim, kryeministri u ndal te vizita në Spanjë, ku mori pjesë në samitin “Në mbrojtje të Demokracisë”, me ftesë të kryeministrit Pedro Sánchez.

“Pas Romës pata një vizitë në Barcelonë, ku, me ftesë të kryeministrit Pedro Sanchez, mora pjesë në tryezën e përbashkët të samitit të quajtur ‘Në mbrojtje të Demokracisë’”, tha Rama.

Ai vuri në dukje rritjen e interesit për Shqipërinë nga biznesi spanjoll dhe ndryshimin e perceptimit ndër vite.

“U pritëm me nderim të veçantë nga Dhoma e Tregtisë e Katalonjës, ku u pa qartë një nivel krejt i ri i respektit dhe interesimit për Shqipërinë edhe nga biznesi i atij vendi. Një vend, emri i të cilit, jo shumë vite më parë në Spanjë, si Shqipëria, lidhej me paragjykime, sot është kthyer në një nga destinacionet e preferuara të qytetarëve spanjollë”, shtoi Rama.

Rama theksoi gjithashtu se Shqipëria tashmë gëzon një pozicion të konsoliduar në tryezat ndërkombëtare.

“Shqipëria nuk është më thjesht e pranishme, por është e besuar, është e respektuar dhe është e vlerësuar si një nga aktorët në tryezë”, u shpreh Rama.

Kryeministri nënvizoi se progresi i vendit dhe mbështetja e partnerëve ndërkombëtarë e vendosin Shqipërinë në një trajektore të qartë zhvillimi.

“Këto ndalesa nxjerrin në pah qartë edhe njëherë se si partnerët tanë seriozë dhe të konfirmuar ndërkombëtarisht, për angazhimet tona, për vullnetin tonë e, mbi të gjitha, falë ecurisë dhe transformimit tonë për të cilin flasin të gjithë, na kanë sjellë në një pikë ku kemi vetëm një dhe vetëm një rrugë: të ecim me shpejtësi vetëm përpara”, tha Rama.

Burimi ATSH