Zonat malore në Shqipëri vijojnë të mbeten ndër hapësirat me potencial të lartë zhvillimi, por për vite me radhë ky potencial është penguar nga mungesa e mundësive konkrete për shfrytëzim.

Kryeministri Edi Rama ndau sot një mesazh informues mbi mundësitë që ofron kjo paketë për zhvillimin e zonave malore në vend.

“”Paketa e Maleve” u jep jetë dhe zhvillim të ri zonave malore, duke lehtësuar investimet e atyre që duan t’i kthehen vendlindjes së të parëve dhe duke krijuar mundësi reale në turizëm dhe agroturizëm, bujqësi, blegtori dhe agropërpunim”, u shpreh Rama.

Në shumë raste, toka e trashëguar ndër breza nuk është përdorur për shkak të mungesës së dokumenteve të qarta të pronësisë, si dhe vështirësive për sigurimin e lejeve të ndërtimit apo tërheqjen e investimeve.

Si pasojë, këto zona janë përballur me ulje të vendeve të punës, largim të banorëve dhe zhvillim të pabarabartë në raport me zonat bregdetare.

Për një pjesë të madhe të familjeve, toka e të parëve ka mbetur më shumë një kujtim sesa një burim zhvillimi ekonomik.

Në këtë kontekst, hyn në fuqi “Paketa e Maleve”, një nismë ligjore që synon të zhbllokojë këtë situatë të trashëguar ndër vite, përmes një sërë masash ligjore dhe administrative.

Nisma parashikon regjistrimin e poseduesve faktikë që nuk disponojnë tituj pronësie, duke u dhënë atyre mundësi ligjore për përdorimin dhe zhvillimin e tokës.

Paketa parashikon gjithashtu procedura të përshpejtuara për marrjen e lejeve, duke hapur rrugën për investime konkrete në turizmin malor, bujqësi dhe ekonomi lokale.

Ndër përfitimet kryesore përfshihen dhënia e pronësisë me çmime simbolike për investitorët, si dhe lehtësi fiskale deri në 10 vite.

Kjo nismë synon jo vetëm nxitjen e zhvillimit ekonomik në zonat malore, por edhe rikthimin e banorëve drejt tokave të tyre, duke krijuar kushte për punësim dhe mirëqenie të qëndrueshme.

Në këtë mënyrë, malet shqiptare synohet të kthehen nga zona me potencial të pashfrytëzuar në hapësira reale zhvillimi dhe investimi.

Burimi ATSH