Në zyrat e delegacionit të Bashkimit Evropian në Shqipëri u zhvillua një diskutim i hapur mes ambasadorëve të shteteve anëtare të BE-së dhe përfaqësuesve të Partisë Demokratike, Jorida Tabaku dhe Oerd Bylykbashi.

Takimi u bë i ditur nga zyra e delegacionit të BE-së në Tiranë. Sipas njoftimi, në fokus të takimit ishin reformat kyçe që kërkojnë mbështetje dypartiake, si reforma zgjedhore dhe ajo territoriale, si edhe forcimi i pjesëmarrjes demokratike në procesin e integrimit evropian të Shqipërisë.

Duke theksuar rëndësinë e transparencës dhe gjithëpërfshirjes në procesin legjislativ, ambasadori i Bashkimit Evropian në Shqipëri, Silvio Gonzato, nënvizoi se angazhimi konstruktiv i të gjitha grupeve parlamentare dhe konsultimet me shoqërinë civile janë thelbësore për miratimin e reformave të qëndrueshme në interes të qytetarëve shqiptarë.

Marrë nga ATSH