Qendra Multifunksionale TOK në Kavajë është një hapësirë mbështetjeje dhe përfshirjeje për komunitetin që ofron shërbime psikologjike dhe sociale.

E ngritur në kuadër të nismës të Bashkimit Europian për kujdesin social, kjo qendër ofron po ashtu programe passhkollore dhe mbështetje për familjet dhe gratë në nevojë në bashkinë Kavajë.

Kryeministri Edi Rama ndau sot në rrjetet sociale momente nga shërbimet e ofruara në këtë qendër e cila ka në fokus edhe fuqizimin e rolit të grave në shoqëri.

Kejsi Toska, koordinatore sociale pranë Qendrës TOK sqaron se kjo nismë vjen si përgjigje ndaj nevojave të qytetarëve të kësaj bashkie.

“Një nga shërbimet që qendra ofron është mësimi pas shkolle. Fëmijët vijnë pas orarit të shkollës për të bërë detyrat, për të mësuar dhe jo vetëm, por edhe për të marrë pjesë në aktivitete edukative, krijuese dhe sportive”, tha ajo.

Po ashtu një shërbim tjetër është këshillimi psikosocial për të gjithë qytetarët e Kavajës.

“Qendra përqendrohet më shumë te gratë dhe fuqizimi i rolit të tyre në shoqëri. Janë mundësuar po ashtu seanca të prindërimit pozitiv, duke bërë të mundur që prindërit jo vetëm të ndajnë përvojat e tyre, por edhe të mësojnë për një marrëdhënie më të mirë fëmijë-prindër”, tha Toska.

Burimi ATSH