Kryeministri Edi Rama u shpreh sot se Fondi Social Kombëtar 2026 ofron garanci për qëndrueshmërinë e shërbimeve për mirëqenien e qytetarëve.

Në nisje të podkastit “Flasim”, Rama u shpreh se kemi kaluar nga 14 shërbime në vitin 2019, në 98 shërbime aktive sot, duke e kthyer shërbimin social në një rrjet real mbrojtjeje sociale në të gjithë vendin.

“Janë 65 mijë individë, që përfshihen nën kujdestarinë e këtij rrjeti të organizuar mbështetje sociale, jo thjesht përmes financimit, por përmes një sistemi të strukturuar shërbimesh, që tanimë është shtrirë në nivel bashkie, buxheti i këtij fondi është rritur gjashtë herë që nga fillimi i kësaj reforme dhe vetëm këtë vit është 17% më i lartë se viti i shkuar”, u shpreh Rama.

Sipas tij, “kjo tregon konsolidim dhe prioritet të qartë politik për ata që janë më në nevojë”.

Kryeministri informoi se në vitin 2026 do të financohen 14 shërbime të reja për fëmijët dhe nënat në nevojë, për personat me aftësi ndryshe, për të moshuarit, gratë dhe vajzat e viktimave të dhunës, si dhe për fëmijët pa kujdes prindëror.

“Nga këto 12 shërbime do të ofrohen në Durrës, Përrenjas, Kurbin, Skrapar, Himarë, Kavajë, Vorë, Korçë, Mat, Patos, Cërrik dhe Kamëz. Ndërsa në nivel rajonal do të ngrihen dy shërbime të reja emergjence dhe një linjë këshillimi për fëmijë”, shtoi ai.

Burimi ATSH