Kryeministri Edi Rama reagoi sot ndaj deklaratës së Shoqatës Kombëtare të Gjyqtarëve, lidhur me shqetësimin e ngritur nga kreu i qeverisë për kërkesën për rritjen e pagave të gjyqtarëve.

Në një komunikim përmes rrjeteve sociale, Rama u shpreh se, “befas Shoqata e Gjyqtarëve shfaqet publikisht si një parti politike, me një gjuhë të papranueshme dhe të pajustifikueshme për ata që përfaqësojnë pushtetin gjyqësor; pra përfaqësojnë një pushtet që arbitron dhe jo një arbitër që thotë: bilbili është i imi, topi është i imi, penalltinë do ta gjuaj vetë dhe porta duhet të rrijë pa portier”, tha Rama.

Kryeministri ndau pjesë nga deklarata e Shoqatës së Gjyqtarëve, ku thuhet se, “shoqata ka ndjekur me keqardhje dhe shqetësim fushatën e spekulimeve publike të ndërmarrë nga kreu i Këshillit të Ministrave, si edhe zhvillimin mediatik të saj, që kulmoi mbrëmjen e kaluar”.

Rama u shpreh se, “besoj se të gjithë e dinë se çfarë është një fushatë dhe çfarë është një fushatë kur e udhëheq unë, së bashku me të gjithë shokët dhe shoqet e armëve të PS-së: një uragan që merr përpara këdo që i del përballë, kur është fjala për një betejë politike”.

Por, shtoi Rama, “kjo nuk është një betejë politike. Ne nuk jemi në asnjë fushatë dhe nuk kemi asnjë qëllim të bëjmë fushatë kundër gjyqtarëve apo t’i vetëvendosim në pozicionin e viktimës, ndërkohë që ajo që kjo shoqatë po kërkon është absolutisht unike në historinë e Europës dhe nuk e bën më të lehtë pozicionin e gjyqtarëve”.

Duke vijuar deklaratën ku thuhet se “e gjithë kjo tymnajë populiste”, Rama u shpreh se shoqata nuk mund t’i japë vetes të drejtën të bëjë përcaktime të tilla.

“Jeni parti politike? Regjistrohuni si parti politike, dilni në garë dhe mbroni platformën tuaj dhe pastaj bëni edhe ju siç bëjnë plot: luftë me etiketime, me sharje, me fyerje, me vendosje të kundërshtarit në pozita që nuk janë absolutisht të lidhura me argumentin, por me etiketimin”.

“‘Tymnajë populiste është krijuar dhe shpërndarë me qëllim linçimin e gjyqtarëve’”, vijoi citimin e deklaratës Rama.

Kryeministri u shpreh se e ka provuar linçimin dhe se është diçka krejt tjetër. Ai theksoi se kjo nuk ka asnjë lidhje me një qëndrim publik, ku as nuk është përmendur njeri me emër, as nuk është fyer apo etiketuar dikush, por është ngritur një problem i madh dhe serioz.

“Ju, zotërinj, kërkoni 37 milionë euro plus nga buxheti i shtetit për t’i rritur vetes tuaj pagat. Kjo është e vërteta që nuk e luan topi”, tha Rama.

Burimi ATSH