Ministri i Drejtësisë, Besfort Lamallari bëri të ditur sot se mbi 13 mijë familje ish-pronarësh do të përfitojnë kompensim financiar nga Agjencia e Trajtimit të Pronave.
Lamallari theksoi se nga sot shteti shqiptar shlyen plotësisht dhe vë në vend përfundimisht të drejtën që u takon.
“Sapo miratuam listën me 3527 subjekte të cilët kompensohen përfundimisht nga Agjencia e Trajtimit të Pronave për pjesën e mbetur prej 30% me një fond prej rreth 1.4 miliard lekë. Mbi 13 mijë familje përfitojnë drejtpërdrejt nga buxheti i alokuar nga qeveria shqiptare”, theksoi Lamallari.

Sipas tij, “ky nuk është thjesht dhe vetëm një akt financiar dhe as vetëm përmbushja e detyrës funksionale por është një akt drejtësie, është respekt për pronën për ligjin dhe për qytetarin”.

“Shteti shqiptar shlyen ndaj tyre pjesën e mbetur prej 30% të kompensimit, si pronarë. Ne jemi të vendosur të vijojmë angazhimin tonë të palëkundur për ta përmbyllur procesin e kompensimit ndaj të gjithë pronarëve, duke përmbushur kështu detyrimin që kemi karshi tyre dhe, sigurisht, si pjesë e angazhimit tonë për standardet evropiane, për një shtet të së drejtës dhe për një të ardhme ku prona, ligji dhe liritë themelore janë të shenjta”, theksoi ministri Lamallari.

Burimi ATSH