Kryeministri Edi Rama siguroi sot se në fund të vitit 2026 do kemi Kadastër digjitale me shërbime shumë më të shpejta dhe cilësore.

Duke e parë zgjidhjen e çështjes së pronës edhe në kuadër të procesit të integrimit europian, Rama theksoi se ky vit ka qenë realisht i suksesshëm në raport me objektivat në të gjitha drejtimet, sepse ndryshe nuk do të ishin hapur gjithë ato kapituj dhe nuk do të ishin marrë gjithë ato vlerësime.

Po ashtu Rama tha se ka qenë një vit i suksesshëm edhe në Agjencinë Shtetërore të Kadastrës.

“Është skanuar përfundimisht 100% e dokumentacionit me rreth 54 milionë faqe. Është përmbyllur 80% e digjitalizimit të kartelave të pronësisë. Ambicia është që shqiptarët me telefon të marrin informacion për pronën, por për këtë duhet sistemuar situata”, tha Rama.

Sipas tij, deri tani janë digjitalizuar 80% e kartelave të pronësisë dhe ky proces mbyllet në vitin 2026 me 4 milionë kartela pasurie të digjitalizuara.

“Në fillim të 2026 nis digjitalizimi i hartave të Kadastrës. Këtë vit është dyfishuar numri i shërbimeve të automatizuara dhe ajo që është akoma më e rëndësishme është që brenda qershorit 2026 do të jetë mbuluar përfundimisht territori i regjistrimit fillestar dhe qytetarët do të kenë qartësi dhe siguri mbi gjithë territorin e pronës”, shtoi Rama.

Burimi ATSH