Kryeministri Edi Rama bëri të ditur sot se Paqja Fiskale eliminon procedurat burokratike dhe synon energjizimin e mëtejshëm të sipërmarrjes.

Në një takim me sipërmarrës ku u diskutua mbi përfitimet që sjell Paqja Fiskale, Rama u ndal te marrëveshja që parashikohet mes sipërmarrjes dhe administratës tatimore për përcaktimin e tavanit të ri të fitimit.

“Në themel Paqja Fiskale ka marrëveshjen me sipërmarrjen mbi përcaktimin e tavanit të ri të fitimit, që do të thotë që bazuar në një projeksion shkencor të fitimit mbi fitimin e viteve të shkuara, plus mbi rritjen ekonomike të pritshme dhe mbi propozimin për të pranuar si fitim të vitit një shifër X, administrata dhe sipërmarrja bien dakord dhe nuk ka më asnjë lloj inspektimi dhe kontrolli”, u shpreh Rama.

Sipas tij, janë pikërisht procedurat burokratike që rëndojnë shpeshherë shumë më tepër se sa barra fiskale.

“Kjo është korniza e Paqes Fiskale. Ne presim energjizim të mëtejshëm të sipërmarrjeve, formalizim të mëtejshëm të ekonomisë dhe lehtësim të mëtejshëm të proceseve të punës për sipërmarrjen”, tha Rama.

Kryeministri shprehu bindjen se duke e çliruar sipërmarrjen nga barra e këtyre të metave të së djeshmes, por edhe duke u projektuar në të ardhmen me një marrëveshje mirëkuptimi me administratën, do të ketë shumë më tepër energji që ajo të merret me punën e vetë”.

“Në këtë mënyrë sipërmarrja nuk do të konsumohet në procedura burokratike apo inspektime dhe kontrolle që kanë ngarkesën e tyre jo të vogël”, tha Rama.

/Marrë nga ATSH