Kryeministri Edi Rama u shpreh sot se nëse ka një gjë me të cilën do të jetë i kënaqur pa kushte, ai do të jetë momenti i anëtarësimit të Shqipërisë në Bashkimin Europian, ngjarje që e konsideroi epokale, historike dhe të jashtëzakonshme.

Në podkastin “Flasim”, Kryeministri Rama u shpreh se asnjëherë nuk ndihet plotësisht i kënaqur me gjërat që realizon.

“Vuaj nga pakënaqësia. Ata që më njohin nga afër e dinë shumë mirë këtë gjë. Ata që më shikojnë nga larg nuk e besojnë fare këtë që po them. Në distancë perceptimi që unë lë është shumë ndryshe nga çfarë unë jam në të vërtetë. Nëse në distancë unë dukem si dikush që mendon se i di të gjitha, në fakt unë vuaj nga pakënaqësia”, tha Rama.

Kryeministri theksoi se “është i pakënaqur me çdo gjë që bën”.

“I shoh me një ndjenjë pakënaqësie ndaj vetes, sepse në çdo gjë mendoj se mund t’i kisha bërë gjërat më mirë”, shtoi Rama.

Nga ana tjetër, Kryeministri u shpreh se lufton shumë për bindjet e tij, por ndërkohë ka farkëtuar edhe mekanizmin e rikonsiderimit të situatave.

“Jam shumë i vështirë në debat se mbroj me shumë forcë bindjet e mia. Por jam shumë i hapur për të kuptuar se çfarë mund të bëj më mirë edhe për të kuptuar se ku mbase tjetri e ka mirë dhe unë gabim. Por nuk e tregoj. E kam pasur gjithmonë këtë, kam qenë gjithmonë i pathyeshëm në kokëfortësinë për të nxjerrë timen”, shtoi ai.

Por sa më shumë ka kaluar koha, Rama tha se “aq më shumë ka kaluar në një mekanizëm të rikonsiderimit të gjërave që kanë ndodhur”.

/Burimi ATSH