Kryeministri Edi Rama deklaroi sot në Bruksel se Shqipëria nuk merr asnjë gjë të mirëqenë në raport me anëtarësimin në Bashkimin Europian, ndërsa siguroi se “do të bëjmë gjithçka që të përmbyllim bisedimet e anëtarësimit brenda vitit 2027 dhe të hyjmë më pas në fazën e mbështetjes politike e të anëtarësimit të plotë”.

Pas mbajtjes së Konferencës së 7-të Ndërqeveritare Shqipëri-BE, kryeministri Rama doli në një konferencë të përbashkët për shtyp me Marta Kos, Komisionere për Zgjerimin në Bashkimin Europian, dhe Marie Bjerre, Ministre e Punëve të Jashtme të Danimarkës, vend i cili mban Presidencën e Këshillit të BE-së.

“Sot Shqipëria del me krenari nga kjo fazë e parë, madje me një ndjenjë edhe të madhe përgjegjësie. Ne nuk përfaqësojmë këtu partinë politike apo vetëm një pikëpamje politike. Përfaqësojmë këtu një komb që mbështet si askush tjetër BE-në dhe anëtarësimin në BE”, tha Rama.

Kryeministri theksoi se më shumë se sa 90% e qytetarëve shqiptarë mbështesin anëtarësimin në BE.

“Jam i sigurt që ata shumë pak që janë në këtë përqindje shumë të vogël që mbetet thjesht nuk do kenë pasur ditë të mirë në momentin që është bërë sondazhi, sepse vështirë të mendoj ndonjë shqiptarë që mendon se anëtarësimi në BE nuk është ideja më e mirë dhe nuk është horizonti drejt së cilit duhet të synojmë për hir të fëmijëve tanë”, shtoi Rama.

Nga ajo me të cilën është përballur Shqipëria në këtë proces, Rama tha se “kemi mësuar një gjë shumë të rëndësishme, kurrë mos merr asnjë gjë të mirëqenë në Bruksel”.

“Kur të buzëqeshin shijoje, por mos e merr të mirëqenë. Mund t’i zhduket nga fytyra sa hap e mbyll sytë. Kështu që vazhdo më fort dhe përgjigju në çdo rrethanë me përulësi e me rezultate. Këto dy gjëra janë ato që ne vlerësojmë më shumë. Me ‘mentorin’ tonë Komisionin Europian, dhe me ‘të urtët’ nga ana tjetër, shtetet anëtare, jemi në duar të mira. Por ne nuk harrojmë asnjëherë se është puna e duarve tona që ka rëndësi jo për ata, por për ne, jo për Komisionin dhe shtetet anëtare, por për popullin shqiptar dhe brezin e ardhshëm”, tha Rama.

Burimi ATSH