Shqipëria dhe Italia mbajnë sot në Romë samitin e parë ndërqeveritar, ku tri janë çështjet kryesore: mbrojtja, industria dhe emigrantët.

Kryeministri Edi Rama e cilësoi këtë samit një tjetër ditë historike në marrëdhëniet ndërkombëtare të Shqipërisë.

Duke u shprehur krenar për këtë ditë, Rama tha në një postim në rrjetet sociale se “mbledhja e parë e përbashkët mes dy qeverive, zhvillohet në Romë për t’i hapur rrugë 16 marrëveshjeve të reja konkrete të bashkëpunimit në kuadër të partneritetit të ngushtë strategjik me fqinjin tonë të çmuar perëndimor”.

Mbledhja e parë mes qeverive të dy vendeve do të drejtohet nga kryeministrja e Italisë, Giorgia Meloni dhe kryeministri Edi Rama. Kjo është konfirmuar nga qeveria italiane përmes një njoftimi të publikuar në faqen zyrtare ku thuhet se samiti i parë ndërqeveritar Itali-Shqipëri do të mbahet sot, në orën 11:30.

Gjatë samitit pritet të ketë dhe takime dypalëshe të ministrave me homologët e tyre. Marrëveshjet pritet të shtrihen në fushën e sigurisë, emigracionit, shëndetësia, energjia, turizmi, ekonomia e tjerë.

Burimi ATSH