Shëndetësia dhe mbrojtja Sociale merr peshën kryesore në projektbuxhetin e vitit 2026 me 820 milionë euro, me një rritje prej 20 milionë euro nga viti i kaluar.

Ministrja e Shëndetësisë dhe Mbrojtjes Sociale, Evis Sala bëri të ditur se 4 miliardë lekë të buxhetit të vitit 2026 do të shkojnë për investime.

Gjatë një vizite në Spitalin Rajonal në Korçë, Sala tha se “jam shumë e gëzuar që një pjesë e investimeve do të shkojnë për spitalin e ri që do të bëhet”.

“Me spitalin e ri të Korçës, urgjencën e Durrësit, spitalet bashkiake të Matit e Tropojës dhe të tjera me radhë akoma do të vazhdojnë intensivisht edhe investimet në modernizimin e infrastrukturës spitalore, me objektivin e qartë dhe të shpallur që në Shqipëri në 2030, asnjë strukturë e shërbimit shëndetësor të mos jetë jashtë standardeve të Bashkimit Europian”, shkruan ministrja.

Fondet për buxhetin e vitit 2026, mbulojnë të gjithë zinxhirin e shërbimit, nga kujdesi parësor te ai spitalor, me një bosht politikash që synon rritjen e kosto-efektivitetit të listës së barnave dhe pajisjeve të rimbursueshme, në mënyrë që çdo lek të kthehet në rezultat shëndetësor për pacientin.

Burimi ATSH