Punimet për ndërtimin e segmentit rrugor Berat-Ballaban kanë avancuar ndjeshëm.

Kryeministri Edi Rama theksoi rëndësinë e këtij aksi rrugor që lidh qarkun e Beratit me qarkun e Gjirokastrës, duke përshkuar një peizazh të mrekullueshëm natyror.

“Vijojnë punimet në rrugën Berat–Ballaban, një aks rrugor me rëndësi strategjike, që lidh qarkun e Gjirokastrës me atë të Beratit dhe përshkon një peizazh të mrekullueshëm natyror”, u shpreh Rama.

Ndërtimi i këtij segmenti do të shkurtojë kohën dhe distancën e udhëtimit, duke e bërë më të lehtë qarkullimin përgjatë aksit Leskovik-Përmet-Këlcyrë-Memaliaj-Berat, një itinerar me potencial të madh për turizmin natyror dhe kulturor.

Sipas planifikimeve, duke nisur nga viti i ardhshëm, rruga Berat-Ballaban do të kthehet në një arterie të rëndësishme për zhvillimin e turizmit dhe ekonomisë lokale.

Aksi nis në dalje të qytetit të Beratit dhe përfundon pranë urës së Ballabanit, duke lidhur në mënyrë të drejtpërdrejtë disa zona rurale me potencial të lartë zhvillimi.

Burimi ATSH