Ministri i Drejtësisë, Besfort Lamallari, zhvilloi sot një takim me të rinj të cilët i janë bashkuar Ministrisë së Drejtësisë dhe institucioneve të varësisë falë Programit Kombëtar të Praktikave të Punës.

Ky program, sipas ministrit është një instrument efikas për të integruar në administratë studentët me ambicie për të pasur një karrierë në institucionet publike.

“Kjo praktikë e paguar është një hap i parë shumë i rëndësishëm në rrugëtimin e tyre profesional dhe përvoja që ata fitojnë sot është një investim në besueshmërinë e institucioneve të së nesërmes”, shkruan Lamallari në një postim në rrjetet sociale.

Sipas ministrit, “konsolidimi i Reformës në Drejtësi, përmbyllja e negociatave me BE dhe Shqipëria 2030, pashmangshmërisht duan gjithashtu idetë dhe guximin e të rinjve tanë të mrekullueshëm”.

“Shqipëria ka nevojë për njerëz që besojnë tek shteti i së drejtës, tek puna e ndershme dhe tek e ardhmja europiane. Prandaj ky angazhim i juaji këtu është më shumë sesa një periudhë pune. Është një rrugëtim i gjatë e i bukur në shërbim të vendit dhe të qytetarëve”, shkruan ministri.

Burimi ATSH