Kryeministri Edi Rama siguroi sot se Shqipëria do të bëjë gjithçka që duhet për t’u ulur më në fund si të barabartë rreth tryezës së Bashkimit Europian.

Pas publikimit të progresraportit të Komisionit Europian për vendet kandidate, Rama ndau deklaratën e Komisioneres për Fqinjësinë dhe Zgjerimin në Bashkimin Evropian, Marta Kos, e cila vlerësoi se “Shqipëria ka arritur një progres të pashembullt”.

“Po, ja dolëm! Dhe do të bëjmë gjithçka që duhet për t’u ulur më në fund si të barabartë rreth tryezës së BE-së. Le të vazhdojmë përpara, së bashku”, shkruan Rama në reagimin e tij.

Ndër të tjera, Komisionerja për Zgjerimin në BE vlerësoi se Shqipëria ka shënuar përparim të paprecedentë.

Ky rezultat i jashtëzakonshëm, sipas Komisioneres Kos, është një dëshmi e qartë e angazhimit të fortë politik të Shqipërisë dhe të aspiratave të qarta europiane të shoqërisë shqiptare.

“Shqipëria ka arritur një progres të admirueshëm që nga konferenca e parë ndërqeveritare. Të tjerë grupkapituj janë hapur gjatë këtij viti dhe në muajin nëntor do të hapet grupkapitulli i fundit. Shqipëria po bën progres në grup-kapitullin e Themeloreve dhe besoj do ta mbyllin deri në fund të këtij vitit”, tha Kos, për Shqipërinë.

Komisionerja për Fqinjësinë dhe Zgjerimin deklaroi se “Shqipëria po bën progres në grup-kapitullin e themeloreve, në fushën e shtetit ligjor dhe mendojmë se do të mund të përmbyllim këtë kapitull brenda këtij viti”.

Burimi ATSH