Shqipëria u përfaqësua me dinjitet dhe me të gjithë fuqinë e ambicies së saj për të ecur përpara në forumin e Dialogut Global të Berlinit.

Kështu u shpreh sot Kryeministri Edi Rama në sezonin e 5-të të Podkastit “Flasim” në rubrikën “Shënimet e javës”.

“Dje, në forumin prestigjioz të Dialogut Global të Berlinit, isha i ftuar bashkë me Diellën, ministren tonë të Inteligjencës Artificiale, e cila për herë të parë komunikoi “live” me një gazetar, moderatorin e mirënjohur gjerman Ali Asllan”, tha Rama.

Kreu i qeverisë u shpreh se “e them me shumë krenari, ndryshimi thelbësor i imazhit dhe i qasjes ndaj Shqipërisë në Gjermani është tashmë një frut me shije të veçantë i përpjekjeve tona sepse deri jo shumë vite më parë, në atë vend, shiheshim ende përmes filtrave të paragjykimeve më shkurajuese”.

Kryeministri Rama u ndal edhe tek Procesi i Berlinit në Londër duke theksuar se “një tjetër moment krenarie për Shqipërinë ishte takimi vjetor i Procesit të Berlinit, që u zhvillua në Londër këtë javë, me praninë e Kryeministrit Keir Starmer dhe Kancelarit Friedrich Merz, i cili theksoi qartë dhe fort vullnetin e Gjermanisë për ta anëtarësuar sa më parë Shqipërinë, Malin e Zi dhe gjithë rajonin e Ballkanit Perëndimor në Bashkimin Europian”.

Kryeministri Edi Rama mori pjesë dje në Global Dialogue (BGD), forumi ndërkombëtar i nivelit të lartë që zhvillohet çdo vit në kryeqytetin e Gjermanisë.

Ky forum kishte në fokus sfidat globale të ekonomisë, klimës, teknologjisë dhe qeverisjes.

Kryeministri ishte i ftuar si njëri ndër dy folësit e sesionit përmbyllës nesër, së bashku me presidenten e Komisionit Evropian, Ursula von der Leyen.

Burimi ATSH