Kryeministri Edi Rama bëri sot të ditur se do të krijohet një akselerator i fuqishëm në mbështetje të ministres së Inteligjencës Artificiale Diella.

Në kuadër të forumit të Investimeve “WB6 – Bashkimi Europian” u zhvillua sot në Tiranë aktiviteti “Hackathon-i rajonal i Inteligjencës Artificiale 2025”, që bëri bashkë 161 pjesëmarrës nga i gjithë Ballkani Perëndimor dhe diaspora, me synimin për të zhvilluar zgjidhje konkrete të bazuara në Inteligjencën Artificiale (IA) për sfida reale shoqërore.

Në këtë drejtim, Rama u shpreh se “kemi sfidën të krijojmë një akselerator shumë të fuqishëm në mbështetje të ministres sonë të Inteligjencës Artificiale që është vetë inteligjencë artificiale”.

Kryeministri theksoi se “ky akselerator do të bazohet tek kapitali njerëzor që ne kemi brenda AKSHI-t apo brenda Agjencisë së Ekselencës”.

“Me këtë sinergji do të mundohemi që çdo njërit nga institucioneve qendrore t’i zgjerojmë trurin me Inteligjencën Artificiale. Ky është plani”, shtoi Rama.

Nisma “Hackathon & Investment Forum EU–WB6”, bashkoi të rinj të pasionuar pas teknologjisë dhe inovacionit, sipërmarrës dhe investitorë nga Ballkani Perëndimor dhe Bashkimi Europian për të ndihmuar zhvillimin digjital të rajonit.

Ky event ofron një mundësi për startup-et dhe krijuesit të zhvillojnë ide dhe zgjidhje digjitale që do të ndikojnë drejtpërdrejt në përmirësimin e shërbimeve dhe infrastrukturës, duke hapur mundësi të reja për inovacion dhe investime.

Burimi ATSH