Komisioni Rregullator i cili u mblodh sot për të shqyrtuar katër projektvendime në lidhje me zgjedhjet e pjesshme vendore, shtyu mbledhjen për ditën e hënë në orën 17:00.

Dy anëtarët e opozitës Helga Vukaj dhe Muharrem Çakaj munguan në mbledhje me arsyetimin se kërkonim me tepër kohë për t’u njohur me projektvendimet si dhe për shkak të situatës ligjore dhe kushtetuese.

“Pas dërgimit të njoftimit dy kolegë të Komisioni Rregullator, Çakaj dhe Vukaj nëpërmjet një emali kërkuan shtyrjen e mbledhjes për të hënën në orën 17:00 me dy shkaqe kryesore, e para për shkak të situatës ligjore dhe kushtetuese, edhe e dyta për shkak se do të donin më tepër kohë për të studiuar 4 projekt-aktet e ardhura për shqyrtim dhe miratim”, tha kryetarja e Komisionit Rregullator Ilirjana Nano.

Për këtë shkak shtoi Nano “duke qenë të pranishëm janë vetëm tre anëtarë të Komisionit Rregullator, sipas dispozitave të Kodit Zgjedhor për këto projekt vendime do të duhet të paktën të ishin 4 anëtarë, të plotësohej kuorumi. Në kushtet kur nuk kemi kuorumin nuk mund të shqyrtojmë projekt vendime në rendin e ditës”.

Mbledhja ishte thirrur për katër projektvendime:

Projektvendim “Për miratimin e disa afateve procedurale që lidhen me zgjedhjet e pjesshme për Kryetar në Bashkitë Tiranë, Berat, Tepelenë, Cërrik, Mat dhe Vlorë, të datës 9 nëntor 2025”.

Projektvendim “Për miratimin e specifikimeve teknike të fletës së votimit për zgjedhjet e pjesshme për Kryetar në Bashkitë Tiranë, Berat, Tepelenë, Cërrik, Mat dhe Vlorë, të datës 9 nëntor 2025”.

Projektvendim “Për përdorimin e pajisjes së identifikimit elektronik të votuesve në zgjedhjet e pjesshme për Kryetar në Bashkitë Tiranë, Berat, Tepelenë, Cërrik, Mat dhe Vlorë, të datës 9 nëntor 2025”.

Projektvendim “Për përdorimin e kamerave regjistruese dhe të monitorëve për shfaqjen e fletëve të votimit në Vendet e Numërimit të Votave në zgjedhjet e pjesshme për Kryetar në Bashkitë Tiranë, Berat, Tepelenë, Cërrik, Mat dhe Vlorë, të datës 9 nëntor 2025”.

Në datën 9 nëntor janë dekretuar zgjedhjet e parakohshme në 6 bashki të vendit.

Burimi ATSH