Në kuadër të Ditës Ndërkombëtare të Gjuhës së Shenjave, nënkryetarja e Kuvendit të Shqipërisë, Klodiana Spahiu, zhvilloi një vizitë në Qendrën Burimore për nxënësit që nuk dëgjojnë.

Gjatë vizitës së saj, Spahiu u njoh nga afër me kushtet dhe shërbimet që ofron institucioni, si dhe zhvilloi një bashkëbisedim me stafin pedagogjik dhe drejtuesit e qendrës. Ajo vlerësoi përkushtimin e mësuesve dhe mbështetësve të nxënësve me nevoja të veçanta, duke theksuar rëndësinë që ka ky institucion në përfshirjen dhe zhvillimin e fëmijëve që nuk dëgjojnë.

Spahiu theksoi rëndësinë e mbështetjes dhe mbrojtjes së identitetit gjuhësor dhe diversitetit kulturor të personave që nuk dëgjojnë.

“Gjuha e shenjave nuk është thjesht një mjet komunikimi, por është çelësi i barazisë, përfshirjes dhe ushtrimit të plotë të të drejtave njerëzore, siç parashikohen edhe nga Deklarata Universale e të Drejtave të Njeriut,” u shpreh Spahiu gjatë bashkëbisedimit.

Nënkryetarja e Kuvendit shtoi se kjo ditë duhet të shërbejë si një moment reflektimi për të gjithë shoqërinë, për të njohur dhe respektuar identitetin gjuhësor dhe kulturor të komunitetit të personave që nuk dëgjojnë.

“Sot, më shumë se kurrë, duhet të nxisim ndërgjegjësimin dhe mbështetjen për këtë komunitet. Duhet të ndërtojmë një shoqëri ku askush të mos mbetet i padëgjuar, ku çdo zë të ketë hapësirën dhe dinjitetin që meriton,” theksoi Spahiu.

Qendra Burimore për nxënësit që nuk dëgjojnë, e hapur fillimisht në vitin 1963, u transformua në një qendër burimore moderne në gusht të vitit 2024. Aktualisht, në të janë të regjistruar 68 nxënës, përkatësisht 47 në arsimin fillor dhe 21 në arsimin e mesëm. Kujdesin dhe arsimin e tyre e sigurojnë 18 mësues, 12 mësues ndihmës dhe 12 kujdestarë.

Burimi ATSH