Ministri i Financave, Petrit Malaj, zhvilloi sot takim me një delegacion të Komitetit të Kontrollit Buxhetor të Parlamentit Europian, të kryesuar nga eurodeputeti Niclas Herbst.

Malaj tha se qëllimi i këtij takimi është vlerësimi i krjimit të mekanizmave të kontrollit dhe auditimit për Facilitetin për Reforma dhe Rritje, si një instrument i ri i bazuar në performancë dhe i projektuar për të nxitur dhe përmirësuar reformat.

Gjatë takimit, ministri prezantoi ecurinë e ekonomisë shqiptare, duke vënë në dukje rritjen e qëndrueshme, stabilitetin makroekonomik dhe përpjekjet e qeverisë për uljen e borxhit publik përmes reformave strukturore.

Në qendër të diskutimeve ishte edhe Plani i Rritjes për Ballkanin Perëndimor dhe mënyrat për të forcuar asistencën financiare të BE-së për vendet që avancojnë me reformat.

Ministri Malaj theksoi se vlerësimet ndërkombëtare SIGMA dhe PEFA për vitin 2024 e rendisin Shqipërinë ndër administratat më të avancuara në rajon sa i përket menaxhimit të financave publike dhe funksionimit të sistemeve të auditimit dhe kontrollit të brendshëm.

“Transparenca dhe integriteti janë thelbësore në përdorimin e fondeve të BE-së. Ne kemi mekanizma të fortë që parandalojnë dhe korrigjojnë çdo parregullsi,” deklaroi Malaj, duke nënvizuar se angazhimi për reformat mbetet prioritet.

Në përfundim, Ministri i Financave konfirmoi përkushtimin e institucionit që drejton për të garantuar përdorim efikas dhe të ndershëm të fondeve publike, në përputhje me standardet e Bashkimit Europian, si pjesë e procesit të integrimit të Shqipërisë në BE.

Burimi ATSH