Ekipi shqiptar i përbërë nga 23 profesionistë civilë nga Agjencia Kombëtare e Mbrojtjes civile (AKMC) dhe ushtarakë nga Njësia USAR e Forcave të Armatosura morën pjesë në stërvitjen komplekse të NATO-s “Menaxhimi i Emergjencave Bullgari 2025”.

Në këtë stërvitje nga 8-11 shtator në qytetin Montana të Bullgraisë morën pjesë mbi 1 000 efektivë nga 18 vende anëtare dhe partnere të NATO-s.

Në kuadër të kësaj stërvitje u zhvillua edhe “Dita e Vizitorëve VIP”, ku Shqipëria u përfaqësua nga drejtori i Përgjithshëm i Agjencisë Kombëtare të Mbrojtjes civile (AKMC), Haki Çako, Komandanti i Brigadës së Evropës Juglindore (SEEBRIG), Gjeneral Bilbil Bitri, si dhe komandanti i Batalionit të Mbështetjes së Emergjencave Civile, Kolonel Hajdar Gurra,.

Drejtuesit e lartë vizituan ekipin shqiptar pjesëmarrës në stërvitje të përbërë nga 23 profesionistë civilë nga AKMC dhe ushtarakë nga Njësia USAR e Forcave të Armatosura.

Të kompletuar me pajisje moderne, mjete logjistike dhe kapacitete operacionale, ndër të cilat spikatën Qendra e Lëvizshme Operacionale e AKMC-së dhe ekipi i kërkim-shpëtimit të FA, ata bashkëpunuan me ekipet e vendeve të tjera të NATO-s dhe partnere, duke demonstruar kapacitetet kombëtare për të operuar në të njëjtat standarde për menaxhimin e emergjencave.

Në stërvitjen komplekse të NATO-s “Emergency Management Bulgaria 2025” efektivët nga 18 vende anëtare dhe partnere të NATO-s u ushtruan së bashku për të forcuar aftësinë e tyre për të menaxhuar emergjencat komplekse në një mjedis sfidues sigurie.

Burimi ATSH