Qeveria shqiptare synon të nxisë edhe më tej zhvillimin e agroturizimit, si një sipërmarrje e rëndësishme për zhvillimin e bujqësisë dhe turizmit.

Zëvendëskryeministrja, njëherësh ministrja e Infrastrukturës dhe Energjisë, Belinda Balluku vizitoi nga agroturizmin “Bukë e Verë”, duke përcjellë një shembull suksesi, të investimit të familjes Kaçorri.

Zvkryeministrja Balluku u shpreh se “pas kantinës së ekselencës “Arbëri”, që na përfaqëson tashmë nëpër botë, po hedh një hap tjetër të rëndësishëm. Agroturizmi “Bukë e Verë” është destinacioni më i ri që pasuron hartën tonë turistike”.

“Ndërtuar me kujdes e shije, kjo sipërmarrje që çeli së fundmi dyert, e vendos edhe Rrëshenin në listën e vendeve që duhet vizituar e njohur nga vizitorët shqiptarë e të huaj”, tha Balluku.

Sipas Ballukut, Shqipëria turistike po konsolidohet çdo vit e më fortë, falë edhe punës dhe iniciativave private, të shtrira tashmë jo vetëm në bregdet.

Përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, çdo fermer mund të përfitojë financim me normë interesi vetëm 2% dhe mbulim kolateral deri në 70%, ndërsa për zonat malore mbështetja është edhe më e madhe falë Paketës së Maleve.