Tuneli i Murrizit, një pikë kyçe infrastrukturore për qarkun e Dibrës, ka regjistruar një shifër rekord në numrin e automjeteve që kaluan gjatë një dite.
Më 17 gusht 2025, plot 19,050 automjete kanë kaluar nëpër këtë tunel, duke shënuar shifrën më të lartë për këtë sezon turistik.

Zëvendëskryeministrja dhe njëherësh ministre e Infrastrukturës dhe Energjisë, Belinda Balluku, gjatë një takimi në Tiranë për të diskutuar për ecurinë e sektorit të turizmit, theksoi se ky është një tregues i qartë se si investimet në infrastrukturë mund të ndihmojnë në nxitjen e turizmit, sidomos në zona që nuk kishin qenë tradicionale për turistët.

“Shifra më e lartë e këtij sezoni vjen nga tuneli i Murrizit. Më 17 gusht, ky tunel regjistroi 19,050 automjete, krahasuar me tunelin e Llogorasë, ku në ditën e pikut, më 10 gusht, kaluan 17,684 automjete”, deklaroi Balluku.

Sipas saj, ky rezultat është një dëshmi e fortë se investimet në infrastrukturë moderne mund të hapin mundësi të reja për zhvillimin ekonomik dhe turistik të zonave të ndryshme, duke i dhënë shtysë edhe atyre që më parë ishin më pak të vizituara.

Tuneli i Murrizit u hap më 14 mars të këtij viti për qarkullimin e mjeteve pas një pune sfiduese që në nisje të tij për shkak të gjeologjisë problematike të zonës nëpër të cilën kalon.

I cilësuar edhe si shtylla kurrizore e rrugës së Arbrit, ai përbëhet nga dy tunele, nga tuneli kryesor me një gjatësi prej 3789 m dhe tuneli i emergjencës me gjatësi 3781 m, me nga 11 hyrje dhe dalje.

Burimi ATSH