Sot, Universiteti i Tiranës kremton 68-vjetorin e themelimit, një ngjarje që shënon një nga momentet më të rëndësishme në historinë e arsimit të lartë në Shqipëri.

Më 30 maj të vitit 1957, Këshilli i Ministrave aprovoi projektdekretin mbi “krijimin e Universitetit Shtetëror të Tiranës”. Në mbledhjen e kësaj date, qeveria vendosi emërimin e Zija Këlliçit si rektor të USHT-së, të Kolë Paparistos si zëvendësrektor për anën shkencore dhe të Hasan Dumës si zëvendësrektor për anën mësimore. Ky vendim do të hynte në fuqi më 1 qershor.

Universiteti i Tiranës është institucioni më i madh publik universitar në vend, dhe prej dekadash ka qenë qendra kryesore e formimit akademik, kërkimit shkencor dhe zhvillimit intelektual në Shqipëri.

Gjatë këtyre viteve, UT ka përgatitur mijëra studentë dhe profesionistë në fusha të ndryshme të dijes, duke luajtur një rol kyç në zhvillimin shoqëror, ekonomik dhe kulturor të vendit. Sot, më shumë se kurrë, Universiteti i Tiranës mbetet i përkushtuar ndaj misionit të tij për të ofruar arsim cilësor, për të nxitur kërkimin shkencor dhe për të ndërtuar ura bashkëpunimi me institucionet kombëtare e ndërkombëtare.

Në fillimet e tij, Universiteti Shtetëror i Tiranës përbëhej nga 6 fakultete:

1) Fakulteti i Histori-Filologjisë;

2) Fakulteti Juridik;

3) Fakulteti Ekonomik;

4) Fakulteti i Inxhinierisë;

5) Fakulteti i Shkencave të Natyrës;

6) Fakulteti i Mjekësisë.

Në këtë 68-vjetor, përmes një postimi në faqen zyrtare të tij, Universiteti i Tiranës falenderoi të gjithë ata që kanë kontribuar në ndërtimin dhe zhvillimin e tij, akademikë, studiues, studentë dhe bashkëpunëtorë të shumtë ndër vite.