Kreu i Partisë Mundësia, Agron Shehaj, në një takim me qytetarë të njësisë nr. 5 në Tiranë, deklaroi se vota për Partinë Mundësia është vota më me vlerë që shqiptarët kanë dhënë ndonjëherë në këto 34 vite. Ai theksoi se kjo është e vetmja forcë politike që përfaqëson shumicën e heshtur të qytetarëve që duan t’ia dalin me punë të ndershme në Shqipëri.

Shehaj u shpreh se sistemi aktual politik dhe administrativ është ngritur për të shtypur qytetarët e ndershëm.

“Të gjithë ata që nuk duan ndryshimin, që janë në mbështetje të status quo-së, duan t’i mbushin mendjen qytetarëve që vota për partitë e reja shkon dëm dhe që do vidhet gjatë numërimit,” tha Shehaj.

Shehaj shtoi se Partia Mundësia është forca e vetme politike në vend që është tërësisht transparente për sa i përket financimeve.

“Nuk ka asnjë financues të fshehtë, asnjë derë që ushqehet me para të pista. Ne jemi të vetmit që përfaqësojmë shqiptarët që duan t’ia dalin me punë të ndershme, të vetmit që ngrihemi çdo ditë për ta përfaqësuar këtë shumicë,” u shpreh ai.

Shehaj e përshkroi realitetin e qytetarëve të zakonshëm si një betejë të përditshme jo vetëm kundër varfërisë, por edhe kundër vetë shtetit.

“Jo vetëm që nuk kanë shtetin krah, por e kanë kundër. Kanë administratën kundër, kanë ministrat, deputetët, qeverinë. Duket sikur këta çdo mëngjes ngrihen me një qëllim të vetëm: t’ua nxijnë jetën qytetarëve dhe t’i ndalojnë të përparojnë me ndershmëri.”

Në përmbyllje, kreu i Partisë Mundësia theksoi se objektivi i tij është i qartë: t’i japë Shqipërisë një qeveri të pakorruptuar dhe kjo, sipas tij, është një arritje e mundur.

“Ky është qëllimi ynë. T’i japim Shqipërisë më në fund një qeveri të pakorruptuar. Dhe kjo nuk është e pamundur”, përfundoi Shehaj.

Burimi ATSH