Kryetarja e Kuvendit, Elisa Spiropali uroi sot besimtarët myslimanë, me rastin e fillimit të muajit të Ramazanit.

Në një postim në rrjetet sociale, Spiropali u uroi të gjithë besimtarëve myslimanë agjërim të lehtë e të pranuar të muajit të Ramazanit.

“Fjala ‘sakrificë’ vjen prej latinishtes e do të thotë ‘të bësh një veprim të shenjtë’! E mendoj agjërimin në religjion, e sidomos te besimi Islam, si thirrje të fortë të ushtrimit të ekzistencës sonë fizike në funksion të rritjes shpirtërore”, u shpreh Spiropali në rrjetet sociale.

Kryetarja e Kuvendit theksoi se agjërimi përshkruhet në Kuranin e Shenjtë edhe si thirrje e fortë për zgjimin e inteligjencës te besimtari, se si të dallojë të mirën nga e keqja, dritën nga errësira.

“Në fakt në suren Ul – Buqarah, 2:157, ka një pasazh të mrekullueshëm: ‘Hani e pini derisa në zbardhje të ditës që të dini të dalloni mes fijes së hollë që ndan dritën prej errësirës’. Të gjithë besimtarëve myslimanë u uroj agjërim të lehtë e të pranuar të muajit të Ramazanit, që çdokush t’i afrohet sa më shumë të shenjtës, bash siç thotë Kurani: Agjëroni që të keni drojë prej Zotit’”, u shpreh Spiropali.

Besimtarët myslimanë në mbarë botën nisën sot Muajin e Shenjtë të Ramazanit. Përveç vlerave shpirtërore e morale, agjërimi ka gjithashtu edhe një vlerë shoqërore shumë të madhe, atë të bashkimit të njerëzve mes tyre dhe kontributit për ata që janë në nevojë.

ATSH