Ambasadorja e Francës në Tiranë, Catherine Suard deklaroi sot se hapja e rezidencës artistike “Vila 31 x Art Explora” është më shumë se sa një hapësirë e thjeshtë pune për artistët.

“Është vizion hapjeje, një vizion i artit pa kufi”, deklaroi ajo, në ceremoninë e zhvilluar për hapjen e rezidencës.

“Është nder i madh të jem mes jush për të përuruar këtë projekt mbresëlënës, 15 muaj pas nënshkrimit të marrëveshjes, nën prezencën e presidentit Macron., emblemë e ndryshimit të Shqipërisë, që Ju, i dashur Edi, po i jepni shtysë”, deklaroi ajo.

Sipas ambasadores Suard, “Vila 31 x Art Explora” më tepër se një hapësirë e thjeshtë pune për artistët është vizion hapjeje, një vizion i artit pa kufi, i arritshëm, i rrënjësuar me inovacionin.

“Ajo e fut Tiranën në rrjetin e platformave të mëdha të artit bashkohor. “Vila 31” është pjesë e bashkëpunimit kulturor mes Francës dhe Shqipërisë. Këtë dinamikë do ta përforcojmë në vitin 2025 duke pasur në sfond emërtimin e Tiranës si Kryeqyteti Mesdhetar i Kulturës”, shtoi ambasadorja.

Ajo informoi se Durrësi po bëhet gati të presë në muajin prill një anije-muze.
“Durrësi është përzgjedhur mes 20 qyteteve si etapë e udhëtimit në Mesdhe. Kjo anije lundruese është mishërimi i udhëtimit ujor të artit, një pasion që Franca e kultivon dhe dëshiron ta ndajë”, deklaroi ambasadorja franceze.