Ministri i Mbrojtjes, Pirro Vengu ndau sot shembullin e nëntetares Gëzime Muça dhe rreshteres Eftali Kamberaj, të cilat janë pjesë e familjes së madhe në Forcat e Armatosura.
“Bashkë me kolegët dhe koleget e tyre, ato përfaqësojnë shpirtin e vërtetë të njësive të ndryshme në Komandën Mbështetëse, tashmë edhe me një shtëpi të re”, nënvizoi Vengu.
Ministri Vengu theksoi se, “investimet e Ministrisë së Mbrojtjes në kapacitete njerëzore dhe infrastrukturë janë objektiva që na motivojnë të ecim përpara me vendosmëri, për të modernizuar dhe për të rritur sa më shumë profesionalizmin në Forcat e Armatosura”.
Nëntetare Gëzime Muça prej 8 vitesh shërben në Forcat e Armatosura në kompaninë kërkim-shpëtim.
“Po kuptoj që zgjedhja që kam bërë para shumë vitesh ja ka vlejtur. Investimet që janë bërë në FA na kanë bërë që të jemi më të motivuar dhe më të vlerësuar”, u shpreh ajo në një video të shpërndarë nga ministri Vengu në rrjetet sociale.
Ndërsa rreshtere Eftali Kamberaj punon infermiere në kompaninë EOD në batalionin e Xhenios. Ajo është prej 16 vitesh pjesë e FA.
“Puna jonë është e vështirë sepse kemi të bëjmë çdo ditë me të panjohurën dhe jemi në ndihmë të komunitetit. Ndihemi të vlerësuar dhe këtë punë e bëjmë me më shumë dëshirë kur shohim investimet që janë bërë në komandën mbështetëse”, tha ajo.
Burimi ATSH
