Ministri i Drejtësisë, Ulsi Manja ndau sot disa pamje nga aktivitetet e kryera nga Qendra e Parandalimit të Krimeve të të Miturve dhe të Rinjve gjatë periudhës janar-korrik 2024.

Manja u shpreh se, gjatë kësaj periudhe QPKMR ka përmbushur disa prej objektivave kryesore të vitit.

Kjo, theksoi Manja, falë forcimit të bashkëpunimit me agjencitë ligjzbatuese, shoqërinë civile dhe organizatat ndërkombëtare, me programet e ndryshme për parandalimin e krimeve te të rinjtë dhe riintegrimin në shoqëri të atyre që janë në konflikt me ligjin penal.

Gjatë këtyre muajve QPKMR ka vijuar bashkëpunimin me Caritas Albania për Shtegun e Mundësive.

Gjithashtu janë kryer fushat sensibilizuese të edukimit ligjor në shkolla. QPKMR ka pasur bashkëpunim institucional me iniciativën gjermane për parandalimin e kriminalitetit të të miturve, mbështetur nga OSBE.

QPKMR nënshkroi një marrëveshje bashkëpunimi me klubin sportiv “Partizani” për përfshirjen në aktivitete sportive të të miturve në konflikt me ligjin.

QPKMR ka pasur bashkëpunim edhe me Shkollën e Magjistraturës në Francë, për zhvillimin e praktikave të mira në drejtësinë për të mitur.

Gjithashtu është nënshkruar marrëveshja ndërinstitucionale për drejtësinë penale për të mitur me Bashkinë Shkodër si dhe Prokurorinë, Gjykatën, Shërbimin e Provës, institucionet e shërbimit social, arsimit dhe shëndetësisë.

Po ashtu, është bërë promovimi i librit “Nevojat e të miturve në konflikt me ligjin dhe përshtatja e programit rehabilitues”.

Gjithashtu është nënshkruar një marrëveshje trepalëshe mes Federatës Shqiptare të Rugby, Drejtorisë së Përgjithshme të Burgjeve dhe QPKMR për të përfshirë sportin e rugby-s në institutin e Kavajës.

Gjithashtu janë zhvilluar tryeza të rrumbullakëta për mbrojtjen e fëmijëve online nga çdo formë dhune dhe abuzimi.

(ATSH)