Në Tiranë po zhvillohet prej ditës së djeshme, Konferenca Ministeriale e Zonës Europiane e Arsimit të Lartë, që mbahet për herë të parë në rajon.

Ministrja e Arsimit dhe Sportit, Ogerta Manastirliu dhe ministrja e Turizmit dhe Mjedisit, Mirela Kumbaro mirëpritën mbrëmjen e djeshme në një atmosferë të veçantë në Pallatin e Brigadave, miqtë e ardhur nga 70 vende të ndryshme të botës, që e kanë kthyer Tiranën në kryeqendrën e diskutimeve për të ardhmen e arsimit të lartë europian e më gjerë.

Kjo konferencë synon afrimin ndaj vlerave themelore të arsimit, ndërkombëtarizimin, lirinë akademike, autonominë institucionale, dimensionin social dhe përgjegjësinë publike të arsimit të lartë.

Ministrja Manastirliu në fjalën e mbajtur dje tha se “në Shqipëri e nisëm reformën në Arsimin e Lartë me synimin që të përmirësonim cilësinë, të rrisnim ofertën akademike, bashkëpunimin ndërkombëtar dhe krijimin e një ekosistemi të gjallëruar të arsimit të lartë që përgatit brezin e ri për të ardhmen. Ne synojmë që Shqipëria deri në 2030 të bëhet një pikë reference për Arsimin e Lartë dhe për kërkimin shkencor dhe për këtë arsye jemi duke investuar në bashkëpunimin ndërkombëtar, në programet e mobilitetit, përmirësimin e kurrikulës mësimore”.

Sot në ditën e dytë do të zhvillohet Forumi Global Politik, ku fokusi i diskutimeve do të jenë; Procesi i Berlinit si një nga shembujt e praktikave të mira të bashkëpunimit rajonal në zbatimin e Procesit të Bolonjës; Mundësitë dhe sfidat për njohjen e kualifikimeve akademike: Konventa e Njohjes së Lisbonës në kontekstin e Konventës Globale dhe Konventave të tjera Rajonale për njohjen; Lëvizshmëria dhe ndërkombëtarizimi si instrumente për të ndërtuar ura midis makro rajoneve dhe sigurimi i cilësisë së arsimit të lartë: Perspektivat dhe strategjitë globale.

Ministria e Arsimit dhe Sportit, përmes këtij ministeriali, synon riafirmimin e vlerave themelore të arsimit, duke përfshirë lirinë akademike, autonominë institucionale dhe sigurimin e cilësisë në arsimin e lartë.