Kryekomisioneri Shtetëror i Zgjedhjeve, Ilirjan Celibashi deklaroi sot pas mbledhjes së grupit të dialogut për Reformën Zgjedhore se “palët duken të angazhuara për realizimin e votës së emigrantëve”.

Në një prononcim për mediet, Celibashi tha se “palët janë angazhuar seriozisht për këtë çështje. Ka interes dhe ka vullnet për të gjetur një zgjidhje lidhur me këtë çështje”.

“Ata donin të dinin mënyrën si do të regjistroheshin ata që duan ta ushtrojnë këtë të drejtë. Çështja e afatit ka rëndësinë e vet, por ajo që unë propozova është që të jetë KQZ, i cili administron kërkesat e votuesve që duan të votojnë jashtë territorit të Shqipërisë”, tha Celibashi.

Celibashi bëri të ditur se “adresuam edhe pyetjet për çështje të ndryshme. Mendoj që votimi të kryhet ose nëpërmjet internetit ose në mënyrë elektronike. Nuk mendoj se është votimi më postë si zgjidhja më e mirë. Një ndër opsionet është ai i kombinuar ku fleta dërgohet në mënyrë elektronike. Kjo është çështje teknike, është zgjidhje që bazohet në interesin e palëve të partive politike”.

Sa i përket votimit elektronik në Shqipëri, Celibashi tha se “nëse do të shtrihet në gjithë Shqipërinë ose jo, pritet të shikohet. Mendoj se është thuajse e pamundur që votimi elektronik të shtrihet në gjithë Shqipërinë, ne kemi rekomanduar të shtrihet në qarqet kryesore, pasi kjo ka mjaft kosto. Nëse duan që ta shtrijnë votimin elektronik në mbarë Shqipërinë, duhet të marrin vendimin tani”.